როგორ შევქმნათ საკუთარი „emoji“ სმაილი Android-ზე?
როგორ შევქმნათ საკუთარი „emoji“ სმაილი Android-ზე?

ერთ-ერთი შესანიშნავი, უკანასკნელი განახლება Android ტელეფონებზე მომხმარებელს საშუალებას აძლევს რომ მან ორი სმაილი გააერთიანოს და ისე გაუგზავნოს emoji მეგობარს. ამის საშუალებით სიცილაკების რაოდენობა გაორმაგდა, შესაბამისად გაორმაგდა საკუთარი განცდების სხვისთვის გაზაირების შესაძლებლობაც.

სამწუხაროდ, განახლება ჯერჯერობით ყველა emoji-ზე არ ვრცელდება, მაგრამ ეს მახასიათებელი დროთა განმავლობაში კიდევ უფრო დაიხვეწება. მომხმარებელს უკვე აქვს შესაძლებლობა გააერთიანოს „მოჩვენება“ „რობოტთან“, ან თუნდაც “ლეკვის“ სიცილაკს „გულის ფორმა“ დაუმატოს და ისე გაუგზავნოს სხვა ადამიანს.

ეს სრულიად ახალი მახასიათებელი ჯერჯერობით მხოლოდ ბეტა რეჟიმში მუშაობს, ამიტომ მისი გააქტიურება და გამოცდა ცოტათი ძნელია თუ არ იცი ეს ზუსტად როგორ ხდება. ამის გამო, Price.Ge წარმოგიდგენთ ძალიან მარტივ გზას, თუ როგორ გაიაქტიუროთ ეს უახლესი გამოგონება.

როგორ გავააქტიუროთ „Emoji Kitchen“?

შეიძლება ეს უთქმელადაც ყველასთვის ნათელი იყოს, მაგრამ მაინც კიდევ ერთხელ ავღნიშნოთ, რომ სმარტფონის ეს ახალი მახასიათებელი მხოლოდ Android მომხმარებლებისთვისაა. სამწუხაროდ, მისით სარგებლობა iOS-ზე ჯერ-ჯერობით არ შეგიძლიათ.

ამ დროისთვის ერთადერთი საშუალება „Emoji Kitchen“-ის გასააქტიურებლად ბეტა პროგრამაში ჩართვაა. საამისოდ გვერდზე Gboard Beta უნდა აღმოჩნდეთ და პროგრამაში გაწევრიანებას დააჭიროთ.

ამის შემდეგ, გახსენით Google Play Store თქვენს სმარტფონში და გადმოწერეთ ან განაახლეთ აპლიკაცია „Gboard app“. თუ ბეტა პროგრამაში სწორად გაწევრიანდით, მაშინ თქვენ უკვე შეგეძლებათ აპლიკაციის განახლება, რაც ძალიან მცირე დროს წაიღებს.

ამის შემდეგ, ყველაფერი მზადაა საიმისოდ, რათა აპლიკაცია გამოიყენოთ და Android-ის ახალი ფუნქცია თქვენი თვალით ნახოთ.

როგორ გავაგზავნოთ ჩვენ მიერ შექმნილი emoji?

პირველ რიგში უნდა აღინიშნოს, რომ ჯერჯერობით ფუნქციის გამოყენება ყველა აპლიკაციას არ შეუძლია. სამაგიეროდ მისი გამოყენება თამამად შეგიძლიათ სცადოთ ისეთ პოპულარულ აპლიკაციებში, როგორებიც არიან WhatsApp, Facebook messenger თუ თავად Google apps.

საიმისოდ, რათა საკუთარი emoji გააგზავნოთ, პირველ რიგში აპლიკაცია „Gboard“ უნდა გახსნათ, რაც ტელეფონის კლავიატურიდანვე შეგიძლიათ „space” ღილაკთან არსებული ლურჯი სიცილაკის დახმარებით.

ამის შემდეგ, თქვენ მარტივად შენიშნავთ წარწერას „Tap an emoji to get suggestions“, რაც იმის მანიშნებელია, რომ ყველაფერი სწორად გააკეთეთ და ახალი მახასიათებლის გამოცდა წარმატებით შეგიძლიათ.

ერთადერთი, რაც ამის შემდეგ უნდა გააკეთოთ სასურველი სიცილაკის არჩევა და მის მეორე სიცილაკთან გაერთიანებაა. შესაძლოა აპლიკაციამ თქვენს მიერ ბოლოს გამოყენებული სიცილაკების მიხედვით თავადაც შემოგთავაზოთ სასურველი კომბინაცია.

როგორც პირველადმა დაკვირვებამ აჩვენა, საკმაოდ ცოტაა ისეთი სიცილაკების ჩამონათვალი, რომელთა კომბინაციაც შეუძლებელია, ასე რომ არჩევანი ძალიან დიდია და თქვენ დაუსრულებლად შეგიძლიათ ახალ-ახალი emoji სიცილაკების შექმნა.


მასალის ავტორი ოთარ ვახტანგაშვილი

კომენტარები