ხილისა და ბოსტნეულის საშრობი: რატომ უნდა გვქონდეს და როგორ შევარჩიოთ
ხილისა და ბოსტნეულის საშრობი: რატომ უნდა გვქონდეს და როგორ შევარჩიოთ


ხილისა და ბოსტნეულის საშრობი - ძალიან სასარგებლო სამზარეულო მოწყობილობაა, რომელიც განკუთვნილია ხილის-ბოსტნეულის გამოსაშრობად და იძლევა პროდუქტის ხანგრძლივი შენახვის საშუალებას, მთელი წლის განმავლობაში. მოწყობილობის მეშვეობით თქვენ მარტივად შეგიძლიათ ბოსტნეულისა და ხილისგან დაამზადოთ ჩირები, დატკბეთ თქვენი საყვარელი ხილეულით მთელი ხანგრძლივი ზამთრის მანძილზე და ამასთან შეინარჩუნოთ და მიიღოთ პროდუქტების ყველა სასარგებლო ვიტამინები და მინერალები. ძალიან კომფორტული და საჭირო მოწყობილობის გამოყენება საკმაოდ მარტივია, მთავარია გაეცნოთ მის რამდენიმე ძირითად პარამეტრს, რომლებზეც ჩვენ ამ სტატიაში მოგიყვებით.

საშრობის კონსტრუქცია

დავიწყოთ კონსტრუქციით - საშრობის ძირითადი შემადგენელი ნაწილებია: ტენი, ძრავი, თერმოსტატი, ვენტილატორი, ხუფი და კიდევ რამდენიმე ელემენტი, რომელიც უკვე კონკრეტულ მოდელზეა დამოკიდებული.

ტენი - მთავარი შემადგენელი ნაწილი ცხელი ჰაერის გამოსაყოფად, სწორედ ის ახდენს ზემოქმედებას პროდუქტებზე და აშრობს მათ. ტენების რაოდენობა მოწყობილობაში დამოკიდებულია ვენტილატორის არსებობაზე, თუ აპარატში არის ვენტილატორი, მაშინ საშრობი აღჭურვილია ერთი ტენით, თუ არა, მაშინ ორით.

თერმოსტატი - მისი მეშვეობით ხდება ტემპერატურის რეგულირება და შენარჩუნება. ნებისმიერი პროდუქტისთვის საკმარისი მაჩვენებელი არის - 35-70 გრადუსი.

საშრობის ძირითადი პარამეტრები

საშრობის სიმძლავრე

დანადგარის სიმძლავრე - საშრობის შერჩევის ერთ-ერთ ძირითად პარამეტრს წარმოადგენს. რაც უფრო მეტია სიმძლავრე, მით უფრო მალე ხდება ხილ-ბოსტნეულის გაშრობა. მოწყობილობის საშუალო სიმძლავრე არის 350-500 ვატი.

ჰაერის ცირკულაცია

ვენტილაცია, რომელიც საშრობში ვენტილატორით ხორციელდება, არის ყველაზე კარგი, რადგან პროცესი მიმდინარეობს საკმაოდ სწრაფად და პროდუქტი თავისუფლად ინარჩუნებს მის ყველა სასარგებლო თვისებებს.

იარუსების რაოდენობა

კიდევ ერთი მნიშვნელოვანი დეტალი არის საშრობის ტევადობა, რაც უფრო მოცულობითია მოწყობილობა, შესაბამისად, მით უფრო მეტი იარუსი აქვს მას პროდუქტების განსანთავსებლად.

პროდუქტები საშრობისათვის

არსებობს ხილის, ბოსტნეულის და შერეული ტიპის საშრობი, რომელშიც შეიძლება, როგორც ორივე ხილ-ბოსტნეულის გაშრობა, ასევე კიდევ სხვა და სხვა შერეული პროდუქტების. მაგალითად - საშრობი - Franko FDH-1065 მასში თქვენ შეძლებთ: ხილის, ბოსტნეულის, თხილეულის, ხორცისა და თევზის გამოშრობას.

ტემპერატურული რეჟიმების მართვა

არსებობს ტემპერატურის მართვის ორი ძირითადი ტიპი, ესენია - ელექტრონული და მექანიკური. ელექტრონული მართვის რეჟიმი ძალიან მარტივია და რატომ - ელექტრონული რეჟიმის შემთხვევაში, საშრობს უკვე თავად აქვს დაყენებული რეჟიმები სხვა და სხვა პროდუქტებისთვის. მექანიკური რეჟიმის შემთხვევაში კი მომხმარებელი თავად უთითებს, როგორც ტემპერატურას, ასევე გამოშრობის ხანგრძლივობას. ორივე რეჟიმი ერთნაირად კარგად მუშაობს და ასრულებს მის მოვალეობას უნაკლოდ, განსხვავება მხოლოდ კომფორტშია.

დამატებითი რჩევები:

·  საშრობში განთავსებულ პროდუქტებზე ზეთის წასმა აკრძალულია;

·  მოწყობილობაში სასურველია ერთდროულად ერთი ტიპის ხილისა და ბოსტნეულის განთავსება, რადგან სხვა და სხვა პროდუქტებს გააჩნიათ განსხვავებული გამოშრობის ტემპერატურა და დრო;

·  გაშრობის პირველი ეტაპი სასურველია მაღალ ტემპერატურაზე მოხდეს, ხოლო ბოლო ეტაპი უნდა იყოს დაბალ ტემპერატურაზე;

·  გამოშრობის შემდეგ პროდუქტების შენახვა სასურველია მშრალ და გრილ ადგილას, თავსახურიან ჭურჭელში.


კომენტარები